في جزيرة العصافير كان فيه عصفور صغير الوانه جميله وكانت كل العصافير البنات بتحبه والعصافير الولاد بيغيرو منه وكان العصفور فرحان بنفسه اوي وحاسس انه احلى عصفور في الجزيره وكان كل يوم يلف الجزيره كلها ويقف على كل شجره شويه ويزقزق مع كل عصفوره شويه وبعد ما يخلص لف على كل الشجر يروح يقف على شجره فاضيه عجوزه مافيهاش اوراق خالص لكن العصفور كان بيحب الشجره دي اوي وبيرتاح عليها وماكانش فيه حد بيقرب من الشجره دي ابدا وفي يوم وهو رايح للشجره لمح عليها عصفوره جميله اول مره يشوفها واتعلق بيها العصفور من اول ما شافها واتعرف عليها وبقوا يتقابلو كل يوم على نفس الشجره وصرحلها العصفور بحبه وهي كمان واتفقو يبنو عش صغير على الشجره دي ويعيشو فيه طول عمرهم ولان العصفور كان معروف ان صحباته كتير العصفوره كانت خايفه من الموضوع ده ومش واثقه فيه برغم انه من يوم ما عرفها ما كلمش ولا عصفوره تانيه وكان مخلص جدا في حبه للعصفوره لكن هي كانت خايفه انه يرجع تاني يحن لزمان واشترطت عليه شرط غريب عشان توافق تكمل معاه وهو وافق من غير تفكير وكان الشرط ده انه يروح لشحرور ساحر العصافير ويطلب منه يسحرله قلبه عشان ما يحبش اي عصفوره تانيه ولا يقدر يفكر في اي عصفوره غيرها وسافر العصفور والعصفوره رحله طويله لاخر الجزيره عشان يروحو لشحرور ولما وصلو حكوله حكايتهم والعصفوره قالت لشحرور انا عايزاك تزرع حبي جوا قلبه وتخلي قلبه يتقفل ع الحب ده وما يقدرش يحب تاني ابدا وبعد ما تقفل قلبه تديني المفتاح والعصفور كان موافق لكن شحرور كان صعبان عليه العصفور جدا وكلمه في ودنه وحذره وقاله بلاش تعمل كده لانها لو ضاعت منك هتموت لاني لو سحرت قلبك بيها مش هتقدر تحب غيرها ولا تعيش بعدها ولو خسرتها هتموت فورا والعصفور قاله وانا مش خايف من سحرك ده لاني من غيرك برده مش هقدر احب غيرها ولا يمكن اعيش بعدها واضطر شحرور انه يوافق على طلبهم واكدت عليه العصفوره انه يسحر كل قلب العصفور وانه ما يقدرش يفكر ابدا في غيرها وانه يقفل قلبه على حبها ويسلمها مفتاحه وقال شحرور انا هسحر قلبك واقفله على حبها وافتكر اني حذرتك لانك مش هتقدر تعيش بعدها وبالفعل شحرور سحر قلب العصفور ورجعو بعدها للشجره بتاعتهم اللي في وسط الجزيره واخدت العصفوره مفتاح قلب العصفور ورمته في البحيره ومن بعدها معاملتها اتغيرت مع العصفور بعد ما اتاكدت انها خلاص ملكته وانه مش ممكن ابدا يعيش من غيرها وبعدها بايام كان العصفور طاير بيلف في الجزيره ولمح عصفورته واقفه عند عش تاني في شجره بعيده طار بسرعه للشجره ولقاها مع عصفور تاني فرحانين وبيزقزقو مع بعض مقدرش يتحمل الصدمه ووقع من فوق الشجره على الارض وهو فاقد الوعي والعصفور التاني نزل بسرعه عشان يلحقه وهو مش فاهم ايه اللي حصل لكن العصفوره قالتله سيبك منه ده خلاص مات.
وبعد يومين العصفور فاق واستغرب انه لسه عايش لانه كان مفروض يموت فورا بعد اللي شافه لان قلبه مايتحملش خيانة حبيبته ولانه مش هيقدر يعيش ابدا بعدها وطار العصفور بسرعه وهو تعبان ومجروح راح لشحرور وحكاله اللي حصل وشحرور قاله اللي حسبته لقيته وانا حذرتك من الاول وعشان كده عملت حسابي وما سحرتش كل قلبك وسبتلك جزء صغير عشان تعيش بيه لكن للاسف انت مش هتقدر تحب تاني وهتعيش طول عمرك مجروح واوعى تسمح باي حب يقرب منك لان الجزء اللي فاضل في قلبك يا اما تعيش بيه يا تحب بيه ولو حاولت تحب تاني مش هتقدر ويمكن تموت.
وطار العصفور من عند شحرور وهو بيفكر في كلامه ومش قادر ينسى اللي حصله ومارجعش تاني للجزيره وسافر لجزيره تانيه بعيده علشان ينسى كل اللي جراله وراح عاش لوحده وبعد فتره بسيطه وهو بيحاول ينسى اللي جراله قابل عصفوره جميله اوي ورقيقه اوي قربت منه ولقى نفسه بيقرب منها ونسى كلام شحرور وتحذيره ليه وبعد فتره صغيره العصفوره اتعلقت بالعصفور وحبته وهو كمان اتعلق بيها اوي لكن هي كانت حاسه ان فيه حاجه منعاه انه يحبها وانه مش قادر يقرب اكتر والعصفور حكالها كل حكايته لكن ماجابش سيرة شحرور ولا السحر اللي في قلبه وكانت العصفوره مش عارفه تعمل ايه لانها كانت كل ما تقرب من العصفور اكتر تحس ان هو بيبعد وكل ما حبها يزيد ليه المه وجرحه يزيد وكانت حاسه انها بتتعبه بالحب ده ولما كانت تسأله يقولها لا انا بحبك ومش هحب غيرك.
وفضل العصفور محير العصفوره يوم كويس معاها ويوم مهموم ومتعصب وكان دايما يختلف معاها ويطلعها غلطانه لغاية ما العصفوره تعبت من الحال ده وقالتله انت مش بتحبني انت لسه عايش في ذكرياتك مش قادر تنسى حبيبتك الاولى مش قادر تنسى اللي جرحتك وخانتك ومش عارفه ازاي تحب عصفوره خاينه ومش قادر تحبني انا برغم كل حبي ليك والعصفور ماكانش قادر يتحمل الكلام ده وكان بيضغط عليه اكتر وبيخنقه وف نفس الوقت عارف ان العصفوره مالهاش ذنب تتحمل انها تعيش مع عصفور بربع قلب مش قادر يديها الحب اللي هي تستحقه ومش قادر ينسى جرحه والمه وكان العصفور متردد انه يحكيلها بصراحه موضوع السحر اللي في قلبه وانه فعلا بيحبها وكل ذره في كيانه حاسه بالحب ده لكن مشكلته ان قلبه اللي هو مفروض يعبر عن الحب ده مش قادر يعيش مع حب تاني لغاية ما جه يوم قررت العصفوره انها تبعد عنه لانه فعلا مش قادر يحبها وطلبت منه انه يثبتلها حبه لو هو كان فعلا بيحبها وعايزها وساعتها اتأكد العصفور انه فعلا بيحبها لانه ما قدرش يتحمل بعدها عنه ولا يتحمل فكرة انها تبعد وتسيبه وحس ان قلبه بدأ يتعب بعد ما حبها اتسرب جواه غصب عنه وبسرعه طار العصفور لرحله طويله اوي ورجع جزيرته القديمه وراح لشحرور وحكاله حكايته وطلب منه يفك السحر اللي في قلبه ويخليه ينسى حبه القديم عشان يقدر يحافظ على حبه التاني وشحرور قاله ده مستحيل الجزء اللي في قلبك مقفول على الحب القديم يا اما يفضل عايش بحبها يا اما يموت خالص ولو الجزء ده مات انت كمان هتموت بعد فتره صغيره ومش هتقدر تعيش وطلب منه العصفور انه يموتله الجزء ده من قلبه ويعمله سحر يخليه يقدر يحب ويعيش بالجزء اللي فاضل ومش مهم يموت بعدها وحذره شحرور وقاله انت هتغلط كده للمره التانيه ودي مافيهاش رجوع لو عملتلك اللي انت عايزه هتبقى دي نهايتك وهتموت بعد ايام واصر العصفور على طلبه وقاله ان خلاص مابقاش فيه رجوع لانه فعلا حب تاني ومش هيقدر يبعد عن الحب ده ووافق شحرور وسحر العصفور.
ورجع العصفور لحبيبته وعاش معاها اجمل ايام وحبها اجمل حب والعصفوره كانت طايره من السعاده لكن يا خساره بعد كام يوم بس العصفور فجأه تعب ووقع على الارض وكان بيموت ومش قادر يتنفس والعصفوره خافت اوي عليه وما كانتش عارفه ايه اللي بيحصل واخدت العصفور في حضنها وهي بتعيط وساعتها العصفور قالها لازم تعرفي كل حاجه قبل ما اموت وحكالها السر اللي كان مخبيه عليها وقعدت العصفوره تعيط وتصرخ وتقول انا السبب انا اللي قتلتك ما كانش لازم تعمل كده انا اللي قتلتك بالحب ورد عليها العصفور قالها الحب عمره ما يقتل انا ما عشتش غير الايام اللي قضيتها معاكي ومن غير حبك ماكنتش عايش وانا فضلت اني اعيش كام يوم بحبك ولا اني اعيش عمر طويل من غير حب وغاب العصفور عن الوعي وصرخت العصفوره صرخه كبيره اوي لمت كل عصافير الجزيره وطلبت منهم يساعدوها وماحدش فيهم كان قادر يعمل حاجه لحد ما جه غراب اسود شكله مخيف قرب من العصفور والعصفوره وسأل على حكايتهم واول ما عرف قرر يشيل العصفور ويطير بيه للجزيره التانيه علشان يروح لشحرور وفعلا اخد العصفور وراح بيه هو والعصفوره ووصلو لشحرور والعصفور كان لسه في غيبوبه وطلبت منه العصفوره انه ينقذه بأي طريقه وقالها شحرور ماينفعش انا حذرته وهو اللي اختار الجزء اللي باقي في قلبه مش ممكن يعيشه وقررت العصفوره فورا انها تديله قلبها علشان يعيش هو لكن شحرور رفض وقال انا مقدرش اعمل كده مقدرش اخد قلبك واسيبك تموتي وانا مش ضامن انه ممكن يقدر يعيش بقلبك وساعتها هتموتو انتو الاتنين قالتله انا موافقه انك تجرب انا فعلا هموت لو هو مات ومش هقدر اعيش من غيره وفضلت تترجى شحرور انه يدي قلبها للعصفور وبعد الحاحها وافق شحرور وفهم ان العصفوره دي قلبها كبير وبتحب حب كبير اوي والقلب اللي بيحب بالشكل ده جزء منه ممكن يخلي العصفور يقدر يعيش وفعلا اخد نص قلب العصفوره واداه للعصفور وعاش العصفور والعصفوره بقلب واحد مقسوم بينهم وعاشو اجمل واروع قصة حب وفضل العصفور مديون طول عمره لحبيته بحياته وقلبه وحبه ...
موضوع: قلب عصفوره 
الأحد أبريل 12, 2009 9:18 pm
