الحلم المصرى

شعر عجبنى وحبيت اجيبهولكوا


مش انا امبارح
رحت من بيتنا ف السيدة
للشغل في حلوان
في سبع دقايق
لا شوفت حد زعلان
ولا حد متضايق
والورد انسان
والنخل متعايق
والناس جميلة مؤدبة
والجو رايق
والدنيا ماشية لوحدها
ولا حد سايق
ومش انا
امبارح برضه
رجعت م الشغل في حلوان
لبيتنا ف السيدة
في خمس دقايق
لا حاسس بغربة
ولا شايف غريب
وقلبى ابيض حليب
عندليب
كروان فرحان
شايل ف قلبى وف جيوبى
الفرح اشكال والوان
وزعت ع الشوارع
والبيوت والجيران
وطلعت البيت
ضربت الجرس
فتحت مراتى بالاحضان
والعيال كمان فرحانين
ناجحين وجايبين
الدرجات النهائية
من غير دروس خصوصية
قمنا رقصنا وغنينا
واحتفلنا واتغدينا
فضلة خيرك
سمك واستاكوزا
وجمبر م الكبير
وحلينا ب مهلبية
وشربنا الشاى كمان
وفجاة
لقيتنى بردان بردان
بصيت لقيت
الشباك مفتوح
ومفيش بطانية
ومراتى جنبى و زى ما هيه
لسه بتعانى من الام المفاصل
وده اللى حاصل
والحمد لله
على كل شىء ...

كلام حلو اوى بس ابقى اتغطى كويس ونام خفيف

واضح جدا ان السبب في الحلم المبالغ فيه ده ان الشباك كان مفتوح ومافيش بطانيه واكيد الجو كان برد اوي لان احلامه شطحت منه اوي وكانت كلها تقريبا مستحيل تتحقق وطبعا اصعب حلم فيهم حكاية انك تضرب الجرس مراتك تفتح بالاحضان اهي دي بقى وسعت منه اوي اوي

عاجبنى اوى كلامك بحسه قريب مش غريب ولكنك تكتب برونق وتعبير جميل عاجبنى قوى وسيبك منهم لا الشباك كان مفتوح وكل ونام ثقيل او خفيف مش هاتفرق