"في حياة كل منا قفا كبير يسمى الحب الاول"
اكيد كل واحد فينا اخد على قفاه على الاقل مره او مرتين في حياته ان ماكانش اكتر وفيه ناس ياما قفاها اتهرى لما بقى بالنسبالها كيف وادمان..
بس طبعا قفا عن قفا يفرق يعني فيه قفا بيعدي وقفا مايتنسيش وعشان كده لازم كلنا نسأل نفسنا ياترى ايه هو اجمد قفا خدناه في حياتنا اكتر قفا وجعنا وقلنا اي اي اكتر قفا علم وطرقع وطلعله صوت اكتر قفا سخن موحوح ياترى ايه؟!
ياترى القفا اللي خدناه من مكتب التنسيق في الثانويه العامه لما كنا كلنا هنبقى دكاتره ومهندسين وفي الاخر كل واحد مننا خد قفا خسف بيه الارض اللي خد قفا وداه تجاره واللي خد قفا رماه على خدمه اجتماعيه واللي خد قفا جامد اوي لقى نفسه في معهد فني وكل واحد خد قفا وداه في حته المهم ان كله خد على قفاه ماعدا العالم الدحيحه السوس اللي احنا طبعا مش بنحبهم ولا نحب نكون زيهم وعلى فكره العالم دي خدت على قفاها زينا ويمكن اكتر بس احنا خدناه في ثانويه عامه وهما خدوه بعد الكليه لما كانوا فاكرين انهم بتفوقهم هيقدروا يتعينوا معيدين فاخدوا قفا جامد اوي طلع من نافوخهم..
نيجي بعد كده بقى لاجمد قفا من وجهة نظري قفا نااااار قفا ملهلب قفا اخر حاجه اكيد طبعا هو القفا اللي خدناه من بنت الجيران او بمعنى اوضح هو قفا اول حب والقفا ده بالنسبه لناس كتير اوي بيكون اجمد قفا خدوه في حياتهم لدرجة انهم بيضربوا بيه المثل يعني لما ياخدوا قفا جامد فحت ويحبوا يبينوا اد ايه القفا ده جامد اوي وقفا مش عادي يقولوا انه قفا عامل زي قفا اول حب يعني مافيش اجمد من كده..
وطبعا ده مش اخر قفا ممكن تاخده في حياتك انت طول ما انت ماشي قفاك هيتهرى يعني قفا حب اول وحب تاني وتالت ياما هتتظبط ده غير بقى قفا الثانويه العامه والكليه والتخرج ولا يا عيني قفا الشغل بعد كده ده يعني لو اشتغلت وفيه ناس بقى مدمنة ضرب على القفا اتهروا لما خلاص قفاهم ورم..
بس ياترى بقى من وجهة نظركم ايه اجمد قفا ممكن ناخده في حياتنا وياريت لو حد عنده الشجاعه يقولي على اجمد قفا خده في حياته بس يكون قفا جامد اوي قفا اخر حاجه...
موضوع: أجمد قفا 
الخميس فبراير 26, 2009 12:23 pm
ههههههههههههههههه بصراحة يامحمد موضوع جامد اخر حاجة بجد اما بالنسبالى انا فموضوع اجمد قفاة كان بالنسبالى مش فى مكتب التنسيق لان الحمدلله الرغبة الاولى اللى كتبتها جالتى بالرغم انى مكنتش مقتنعة اوى بس مكنش عندى اختيار تانى بس اكيد كلنا حبينا وفشلنا وغالبا الحب الاول دا بيكون مش مبنى على اساس صح او بنكون صغيرين اوى وبعدين انا بصراحة مش عارف انت لية مصر ومصمم تقلب على نفسك وعلينا المواجع يعنىِ
تفتكر انا كده ادمنت ولا لسه فى مرحلة التعاطى؟؟؟
