موقف دوت كوم

الواحد مرت عليه مواقف كتير جدا مايفتكرهاش بس ممكن يفتكرها واحدة واحدة وانا افتكرت حاجة شفتها قعدت اضحك عليها :
واحد راح لمعصرة قصب والقصب مرصوص قدامه قاله ماتعرفش حد بيبيع قصب ! قام الراجل بصله باستغراب وحب يهزر معاه فقاله اسأل الراجل اللى جنبنا ده وهو هيدلك وكان جنبهم بتاع حدايد وبويات وكان الراجل قاعد برة وبيشرب قهوة فراحله وقاله عندك قصب ! قام الراجل بصله وقاله لأعندى بن ! قام سأله ماتعرفش حد بيبيع قصب , قاله روح للى جنبنا ده فراح للمعصرة وقاله بيقولى أجيب من هنا , قاله مش قلتلك روح له وهو هيدلك!!!! وانا كنت واقف فى المعصرة ميت على نفسى من الضحك قام الراجل أخيرا حس انهم بيشتغلوه قالهم فيه ايه يا جماعة هو عشان أنا مش من البلد!!!

الحقيقه انا عمري ما كنت بحب اعاكس البنات وبرغم كده ليا بعض المواقف بسبب المعاكسه وكان السبب فيها ان اصحابي كانوا بيحاولوا يعلموني ازاي اعاكس لاني وقتها كنت خجول وطيب وبضرب لخمه ومن المواقف دي مره وانا لسه في اولى ثانوي وكنت اتعرفت على ولدين اكبر مني كانوا في تالته ومعروف ان في اخر ايام الدراسه قبل الامتحانات ما بيكونش فيه انتظام في الدراسه ويوم خرجنا بدري اتمشينا على البحر وشوفنا بنات قاعدين تحت شمسيه ع الشط فواحد قال يلا نروح نكلمهم ونتعرف عليهم قلتلهم لا انا ماليش في الحاجات دي ضحكوا عليا واتريقوا وقالولي ازاي ما ينفعش تعالى واحنا نعلمك المهم خلوني ادخل اغلس واقعد على كرسي جنب البنات وهما هيتكلموا وانا سمعت الكلام ودخلت فعلا ومن حظنا الجميل البنات طلعوا صايعين اوي وسمعونا احلى كلام واحلى شتايم مش هقدر اقولها وبنتين منهم هجموا عليا وفكوا رجلين كرسي البحر اللي كنت قاعد عليه ووقعوني ع الارض وتقريبا كتفوني وساعتها كان فيه بنت راحت ندهت لراجلين كل واحد فيهم عامل زي الحيطه وشنبه اكبر من شعري وللعلم انا كنت مطول شعري اوي ايامها ..المهم واحد منهم شالني من ع الارض بايد واحده ومسكني كده وقالي مش عارف اضربك بس ازاي اصلي كنت قصير ورفيع وجسمي قليل اوي يعني مافيش فيا حته تضرب وقبل ما يمد ايده عليا واحد من الاتنين اللي معايا اخدته الحماسه وزعق وقاله سيبه انت ازاي تمد ايدك عليه وتقريبا قبل ما يكمل جملته كان قلم نازل على وشه من الراجل التاني وبعدين الاولاني سابني واداله قلم تاني ولقيت كل حته في وش صاحبي ده بتجيب دم والغريبه ان الولد ده ما عملش حاجه خالص لان صاحبنا التالت هو صاحب فكرة المعاكسه وهو اللي رمى كلام على البنات وانا اللي قعدت في وسطهم والتالت هو اللي كل العلقه ودي كانت اخر مره اشوف وشهم فيها واخر مره اعاكس على البحر